2019 MCLAREN 600LT SPIDER: Ветер во косата со 315 км/ч

По купе верзијата пристигнува верзија со отворен покрив

McLaren наведува дека 600LT Spider има склопив тврд покрив, чиј механизам ја зголемил вкупната маса на возилото за само 50-на килограми, во однос на 600LT Coupe.

За погон на новиот McLaren 600LT Spider е употребен истиот 3.8-литарски twin-turbo V8 мотор, кој ја движи и купе варијантата од 2018 година. Исти се и моторните спецификации – 600 кс и 620 Нм максимален вртежен момент.

Силата се пренесува на тркалата со помош на 7-брзински автоматизиран менувач со двојна спојка, а суперспортскиот автомобил од место до брзина од 100 км/ч пристигнува за само 2,9 секунди, идентично како кај купето.

За постигнување на брзина од 200 км/ч му се потребни 8,4 секунди, минорни 0,2 секунди повеќе од купе верзијата.

Максималната брзина на McLaren 600LT Spider со подигнат покрив изнесува 324 км/ч, а со спуштен е електронски ограничена на 315 км/ч.

Секако, највпечатливата разлика помеѓу купето и кабриолетот е токму тврдиот склопив покрив, кој се состои од три елементи. Покривот се спушта и подигнува со притисок на копче на командната табла, а двете операции можат да се изведуваат и во движење, при брзини до 40 км/ч.